6 këshilla fetare për një familje të lumtur

Gjashtë këshilla fetare për një familje të lumtur

“Një familje e lumtur nuk zhvillohet pa mundin tonë. Për të krijuar një familje të lumtur ne duhet të jemi të kuptueshëm, të durueshëm, të bëjmë kompromis, të dhurojmë dashuri dhe nuk duhet të ketë vend për ego dhe krenari”.

Të jetosh një jetë të lumtur familjare është një bekim. T’i kesh më të afërmit dhe dashurit tuaj pranë jush, ju fuqizon me besimin se ju mund të kaloni çdo sfidë që jeta sjell. E gjithë kjo është një privilegj që kërkon kujdes dhe përkushtim të vazhdueshëm.

Secili nga ne është pjesë e një familje. Qoftë anëtarë të familjes të lidhur nga farefisnia apo miqësia, e dimë që janë të dashurit tanë, sado që ndodh të na bezdisin, nuk mund të jetojmë pa ta. Disa njerëz janë të bekuar të kenë një familje të ngushtë. Disa nuk e kanë atë fat. Sido që të jetë, nëse dëshironi të keni një familje të lumtur, njihni sfidat që gjithmonë do të jenë të pranishme. Dhe mbi të gjitha, duhet të jeni të vetëdijshëm për veprat dhe kontributin tuaj në familje.

• Largoji fjalët negative

Jepni fund thashethemeve të pavenda, fjalëve të këqija dhe të folurit pas shpinës së njerëzve tjerë. E dimë të gjithë se si rrjedhin fjalët e pabaza. Cikli shkon rreth dhe para se të dalë ndonjë e vërtetë në shesh, dikush deri atëherë do duhej të jetë lënduar. Tubimet familjare mund të jenë vatër e bisedave të tilla. Njerëzit e kanë shumë të lehtë të japin informata potencialisht të dëmshme për të tjerët pa menduar. Në raste të tilla, braktiseni këtë dukuri duke ndërruar temën dhe bëhu ndryshimi pozitiv duke mos filluar kurrë i pari bisedat negative për të tjerët.

• Parashikoni nevojat e tyre dhe tregoni ndjeshmëri me ta

Pa marrë parasysh se sa të afërt jeni ju me familjarët tuaj, ju kurrë nuk mund të kuptoni plotësisht se çfarë fshihet pas tyre. Kjo, jo me arsyen që ju nuk jeni mjaftueshëm të lidhur, por ndoshta sepse familja juaj ndonjëherë zgjedh të mos ju ngarkojë me problemet e tyre. Nëse ju mendoni se diçka nuk është në rregull, vëzhgoni nga afër por me kujdes. Mos përkeqësoni situatën duke insistuar në diçka të cilët familjarët tuaj nuk duan të ndajnë me ju. Ndihmoni nëse dini dhe nëse mundeni bëjeni atë me kujdesin më të madh. Bëni një du’a (lutje) për ta. Profeti Muhamed (paqja qoftë mbi të dhe familjen e tij) tha: “Lutjet e bëra për vëllanë janë ato të cilat marrin përgjigje më të shpejtë nga Zoti”. Mbi të gjitha, respektoni dëshirat dhe kërkesat e njëri tjetrit.

• Gëzohuni për sukseset e familjes

Gëzohuni me ta kur diçka e mirë ndodh në familjen tuaj. Nëse bëhet fjalë për një ngritje në pozitën e punës, një shtëpi, apo veturë të re, mos i gjykoni duke i pyetur se pse ata duhet t’i meritojnë këto gjëra. Mësoni të jeni të lumtur për familjen tuaj sikur të ishit ju ata që po festoni për vete. Gjithashtu, punoni sa më shumë që të shijoni gëzimin shumëfish.

• Duhet të jeni modest

Sigurisht që blerja e gjërave të shtrenjta, të ushqyerit mirë, vizitat në vendet ekzotike ju bëjnë të ndiheni mirë. Megjithatë, ju duhet të bashkëndjeni me familjarët të cilët janë duke kaluar kohë të vështira. Ata mund të ndihen sinqerisht të lumtur për arritjet tuaja, por gjeni kohën dhe ndani të arriturat tuaja me ata. Trajtoni njerëzit ashtu si dëshironi të ju trajtojnë juve.

• Lërini fëmijët larg nga grindjet tuaja

Të gjitha familjet fjalosen dhe grinden. Është e natyrshme sepse është njerëzore. Njerëzit kanë mendime, koncepte dhe parime të ndryshme. E nganjëherë këto mendime mes familjarëve nuk përputhen. Asnjëherë mos e nxirrni zemërimin ose hakmarrjen ndaj fëmijëve tuaj. Fëmijët janë të pafajshëm. Kur flasim për grindjen, Pejgamberi (paqja qoftë mbi të dhe familjen e tij) tha: “Muslimanët nuk lejohen të mos flasin me tjetrin për më shumë se tre ditë. Bëhuni personi i cili është i pari në afrimin (pajtimin) e tjetrit”.

• Qëndroni të lidhur

Bëni përpjekje për të qëndruar në kontakt. Sigurisht, familjet e ngushta kanë aftësinë të vazhdojnë ‘bisedën’ aty ku ka mbetur më parë edhe pa u takuar me javë apo muaj. Mbajeni këtë afërsi mes familjarëve tuaj duke i kontaktuar. Në ditët e sotme, kjo gjë është lehtësuar tej mase falë rrjeteve sociale, mirëpo asgjë nuk mund të krahasohet me takimet ballë për ballë. Takohuni madje dhe për 30 minuta gjatë drekës dhe interesohuni se si janë dhe mbani këtë ngrohtësi mes familjarësh si një gjë të çmuar.

Një familje e lumtur nuk zhvillohet pa mundin tonë. Për të krijuar një familje të lumtur ne duhet të jemi të kuptueshëm, të durueshëm, të bëjmë kompromis dhe të dhurojmë dashuri dhe nuk duhet të ketë vend për ego dhe krenari. Nëse jeni lënduar nga familja juaj, pyesni veten a dëshironi që gjërat të përmirësohen. Nëse përgjigja është po, atëherë bëni gjithçka me fuqinë tuaj për t’i kthyer të pahijshmet në gjërat pozitive.

(Redaksia e revistës “Vlera”, nr. 26, maj/qershor 2018, fq. 36-37)