“Mësimet e Isait a.s: Bekimi, Besimi dhe Pastrimi i Zemrës”

Autor:  Ikballe Beriash Huduti

“Dhe më ka bërë të bekuar kudo që të jem, dhe më ka urdhëruar të fal namazin dhe të jap zeqatin, sa të jem gjallë.”
(Surja Merjem, 31)

Figura e Isait (paqja qoftë mbi të) në traditën islame paraqitet si shembull i pastërtisë, devotshmërisë dhe bekimit hyjnor. Allahu në Kuran e përshkruan atë me fjalët:
“Dhe më ka bërë të bekuar…”, duke e cilësuar si njeri që përhapte mirësi, udhëzim dhe dritë shpirtërore.

Edhe Bibla e përshkruan misionin e tij si dritë dhe mëshirë për njerëzit:
“Ai erdhi si dritë për njerëzit, që kush beson në të të mos rrijë në errësirë.” (Gjoni 12:46)

Sheriati pa besim — një gabim që e kritikoi Isa a.s.

Kur lexojmë historinë e Isait a.s., shihet qartë se ai kritikoi një pjesë të jehudëve të kohës së tij, jo për sheriatin e tyre, por për faktin që e kishin reduktuar fenë në rregulla, rituale dhe formalitete pa besim të vërtetë.

Bibla e përshkruan qartë këtë kritikë kundër atyre që ruajnë rregullat por humbin zemrën:

“Ky popull më nderon me buzë, por zemra e tyre është larg meje.”
(Mateu 15:8)

Dishepujt shpesh menduan se Isa mohoi ligjin, por ai tha:
“Mos mendoni se kam ardhur të shfuqizoj Ligjin… por për ta përmbushur.”
(Mateu 5:17)

Në të vërtetë, ai mësonte: “Sheriati pa besim, pa bindje dhe pa iman nuk ka vlerë.”

Kurani dhe dallimi mes “muslimanit” dhe “besimtarit”

Në një ajet të rëndësishëm, një grup njerëzish i thanë Profetit Muhamed s.a.a.: “Ne jemi besimtarë.”  
Allahu iu përgjigj:

“Thuaj: ju jeni muslimanë, por imani s’ka hyrë ende në zemrat tuaja.”
(El-Huxhurat, 14)

Ky mësim është shumë afër mësimeve të Isait në Bibël, ku ai thekson se fryti i zemrës tregon vlerën e njeriut:

“Nga frytet e tyre do t’i njihni.”
(Mateu 7:16)

Shenjat e imanit sipas Isait a.s.

Isa (paqja qoftë mbi të) na mëson se imani i vërtetë ka dy shenja të mëdha:

1. Mëshira

– Kur e sheh krijesën e Allahut dhe e do, e mëshiron, të dhimbset.
– Nëse shikon problemet e të tjerëve dhe nuk të prek zemra, kjo është shenjë e mungesës së imanit.

Edhe Bibla e përforcon këtë:

“Lum të mëshirshmit, sepse do të gjejnë mëshirë.”
(Mateu 5:7)

2. Dashuria

– Kur gëzohesh për sukseset e të tjerëve.
– Kur nuk ndjen xhelozi, urrejtje apo mllef.

Bibla thotë:

“Kush nuk do vëllain e vet, të cilin e sheh, si mund ta dojë Zotin të cilin nuk e sheh?”
(1 Gjonit 4:20)

Xhelozia dhe urrejtja janë sëmundje të zemrës që largojnë imanin.

Isa a.s. paralajmëronte:
Njeriu që ka urrejtje në zemrën e tij, edhe nëse falet e agjëron, është shpirtërisht i sëmurë.

Pastrimi i zemrës: mësimi më jetik

Nëse zemra nuk pastrohet nga urrejtja, Allahu e pastron atë në botën tjetër – si ari që shkrihet dhe pastrohet në zjarr.

Bibla e shpjegon po këtë me fjalë të ashpra:

“Lum ata që kanë zemër të pastër, sepse do ta shohin Zotin.”
(Mateu 5:8)

“Kush është komshiu im?” — mësimi universal i Isait

Isa (paqja qoftë mbi të) u mësonte dishepujve: “Kujdesuni për komshinjtë tuaj.” Kur dishepulli pyeti: “Kush është komshiu im?” Isa (paqja qoftë mbi të) u përgjigj:
“Çdo njeri ndaj të cilit mund të bësh mirë.”

Bibla e sjell të njëjtin mësim përmes “Samaritanit të Mirë”:

“Shko dhe bëj edhe ti po ashtu.”
(Luka 10:37)

Pra, çdo njeri është komshiu ynë.

Shembujt e butësisë së Isait a.s.

Nga mësimet e tij:

– Kur të tjerët shihnin të keqen, Isa kërkonte të mirën.
– Kur njerëzit dënonin një grua mëkatkore, ai tha:

“Kush është pa mëkat, le të hedhë i pari gurin.”
(Gjoni 8:7)

– Kur shokët panë të keqen tek një kafshë e ngordhur, ai kërkoi një cilësi të mirë. Kjo është filozofia shpirtërore e Isait a.s.: gjej bukurinë aty ku të tjerët shohin të keqen.

Falja, pajtimi dhe largimi i urrejtjes

Mësimi i fundit i Isait (paqja qoftë mbi të) është thellësisht human:

– Mos e lejo urrejtjen të rritet brenda teje.
– Nëse dikush të ka bërë keq, kërko pajtim.
– Fal, edhe kur është e vështirë.

Bibla e thekson fuqishëm: “Fali ata jo shtatë herë, por shtatëdhjetë herë nga shtatë.”
(Mateu 18:22)

– Kërko falje kur vetë ke gabuar.

“Nëse i sillni dhuratë altarit dhe kujtoni se vëllai ka diçka kundër jush, shkoni pajtohuni më parë.”
(Mateu 5:23–24)

Zemra e mbushur me urrejtje nuk ka vend për iman. Në thelb, mësimi i Isait (paqja qoftë mbi të) është një thirrje e përhershme për pastërti shpirtërore: Besimi nuk është vetëm ritual, por një zemër e butë, e pastër dhe plot mëshirë.