Rreziku i ndërprerjes së lidhjeve familjare
Editorial
Falënderimi i takon Allahut që na udhëzoi në Islam dhe na bëri nga pasuesit e Profetit Muhammed (s.a.v.a.) dhe Ehli Bejtit të tij të pastër. Paqja dhe mëshira e Allahut qofshin mbi të dhe mbi familjen e tij.
Një prej amaneteve të mëdha që Allahu i ka dhënë njeriut është lidhja e gjakut dhe farefisnisë. Këto lidhje nuk janë thjesht marrëdhënie shoqërore, por janë të shenjta dhe të lidhura me besimin tonë. Shkëputja e tyre është mëkat i madh dhe një prej shkaqeve të mallkimit hyjnor.
Ajetet kuranore dhe komentimi i tyre
“Dhe ruajeni lidhjen me farefisin, të cilën Allahu ka urdhëruar të mos e këputni.”
(Sure Nisa, 1)
Ky ajet vjen menjëherë pas përkujtimit të krijimit të njeriut dhe njësimit të Allahut. D.m.th., ruajtja e lidhjeve familjare është e lidhur me vetë besimin tonë te Krijuesi. Ulematë thonë se këtu përfshihen jo vetëm prindërit e afërm, por edhe kushërinjtë dhe familja e gjerë. Prerja e tyre shihet si mosmirënjohje ndaj mirësisë së Allahut.
“Ata që e prishin lidhjen që Allahu e ka urdhëruar të mbahet dhe bëjnë prishje në tokë – mbi ta është mallkimi dhe ata do ta kenë shtëpinë e shkatërrimit.”
(Sure Ra’d, 25)
Ky ajet e quan prerjen e lidhjeve “prishje në tokë” (fasad). Kjo do të thotë se kur një familje ndahet dhe grindjet përhapen, pasojat nuk mbeten vetëm te individët, por shkatërrojnë shoqërinë. Mallkimi i Allahut është largimi i mëshirës së Tij dhe lënia e njeriut pa bekime në jetë.
“A mos vallë, nëse ju shmangeni (nga e vërteta), do të bëni shkatërrim në tokë dhe do t’i këputni lidhjet e farefisnisë? Të tillët janë ata që Allahu i ka mallkuar, ua ka shurdhuar veshët dhe ua ka verbuar sytë.”
(Sure Muhammed, 22-23)
Ky është ajeti më i rëndë për këtë temë. Allahu e lidh prerjen e lidhjeve me mallkimin e Tij të drejtpërdrejtë dhe me verbimin shpirtëror. Imamët kanë thënë se kjo verbëri nuk është vetëm e syve, por e zemrës – njeriu nuk sheh më të vërtetën dhe nuk pranon këshilla. Prerja e lidhjeve bëhet pengesë për pranimin e udhëzimit hyjnor.
Hadithe dhe fjalë të mençme nga Ehli Bejti a,s,
Profeti Muhamed s.a.a. – Paqja qoftë mbi të dhe Familjen e tij na ka mësuae se :
“Kush dëshiron që t’i zgjatet jeta dhe t’i shtohet risku, le t’i mbajë lidhjet farefisnore.”
Ky hadith tregon se mbajtja e lidhjeve nuk është vetëm detyrim fetar, por sjell bekime praktike në jetë: jetë më të gjatë dhe furnizim më të gjerë.
Imam Aliu (a.s.):
“Mbajtja e lidhjes familjare është shkak i pastërtisë së fesë, shtimit të pasurisë dhe vonimit të afatit (të jetës).”
Imam Aliu na mëson se lidhjet familjare ndikojnë drejtpërdrejt te zemra, morali dhe pasuria jonë.
Mesazhi moral
Edhe nëse familja të ka bojkotuar për arsye fetare ose shoqërore, mos ua kthe me të njëjtën monedhë.
- Dërgo selam, urime në gëzime, ngushëllime në raste zie.
- Bëj dua për ta, edhe nëse nuk të thërrasin.
- Mbaj zemrën të pastër, sepse Allahu është Dëshmitar i durimit tënd.
Profeti (s.a.v.a.) ka thënë:
“Mbajtësi i vërtetë i lidhjeve nuk është ai që i kthen vizitat kur e vizitojnë, por ai që i mban ato edhe kur të tjerët i kanë këputur.”
Doracak praktik: Si të veprosh kur familja të bojkoton?
- Ruaj zemrën e pastër – mos mbaj urrejtje.
- Mos kthe me fyerje – mjafton një “Selam alejkum”.
- Bëj dua – kërko udhëzim dhe mëshirë për familjen tënde.
- Dërgo shenja respekti – mesazh, dhuratë e vogël, urim.
- Mbaj distancë të shëndetshme – nëse ofendimet janë të rënda, kufizo kontaktin por mos e këput krejtësisht.
- Kujdesu për veten – lexo Kur’an, lidhu me njerëz që të mbështesin shpirtërisht.
Ndërprerja e lidhjeve familjare është mëkat i madh dhe sjell mallkim. Por durimi dhe ruajtja e respektit edhe kur tjetri të poshtëron, është afrim te Allahu.
Lidhjet e gjakut janë të shenjta dhe besimtari i vërtetë i ruan, edhe kur të tjerët i këpusin.
O Allah, na bëj prej atyre që i mbajnë lidhjet familjare dhe na ruaj nga mallkimi i atyre që i shkëpusin ato. Amin.
Msc. Ikballe Berisha Huduti
